مشترياتي من موقع شي ان Shein Haul

مشترياتي من موقع شي ان Shein Haul

بسم الله الرحمن الرحيم

مقدمة :

اهلين اليوم بكتب عن تجربتي الثانية في الشراء

من موقع شي ان و هو موقع مختص بالملابس و 

الاكسسوارات و الكماليات وغيرها 

:)

الطلب :

طلبت عبر تطبيقهم و دفعت بالفيزا و ممكن الدفع عند الاستلام

بس انصحكم تدفعون اونلاين لانه راح يخصم لكم

استخدمت كود خصم اعطوني اياه كان (shein20 )

ولكن مادري اذا بيضبط معكم ولا خلصت صلاحيتة :)

بس عموما لو كتبتوا بقوقل ( كود خصم شي ان ) راح يطلع لكم

و خصم لي كثير الصراحة 

السعر كان / 417

بعد كود الخصم و خصم الدفع اونلاين / 290 

!!!!

التوصيل :

بحسابي بالموقع مكان تتبع الشحنة حط لي ان الشحنة لازالت بمستودع الصين 

و عند الطلبية مكتوب انه تم شحن طلبك 😕؟

المهم قلت بنتظر واذا تأخروا بكلمهم 

و الحمد لله ما تأخر الطلب اخذ 6 ايام ووصلت لي اليوم

مشترياتي و رأيي :

(بحط الاسعار بدون الخصم )

الفستان الاحمر : 50 ريال
 عالطبيعة يميل عالون العنابي
القماش حلو بس خفيف مو ثابت حسيته يسمن شوي
القماش مو شفاف

بس عند نهاية الاكمام الخياطة مو حلوة

الفستان الوردي : 54 ريال
حبيت القماش ثقيل وغير شفاف و الشكل نفس الصورة بس حسيته شوي اقصر بشي بسيط
بس يحتاج كوي وبيطلع رهيب حبيتة
بعد التجربة :
بالبس شكلة جميل و انيق الملاحظتين الي عندي
1- المقاس تمام ولكن عند الاكمام شوي ضيق
2- الفستان شفاف بشكل بسيط بمعنى لو لبستي شي غامق تحته راح يبين اللون

البلوزة :29 ريال
قطنية و غير شفافة
حبيت مقاسها يعني خذوا مقاسكم بالضبط
غسلتها اكثر من مرة ونفس ماهي جودتها حلوة
بس انها طويلة شوي
شكلها كيوت 🙊

تي شيرت : 22 ريال
القماش حلو قطني خفيف
المقاس ما اعجبني حسيته غريب الاكمام واسعة و الوسط شوي ماسك
التي شيرت قصير يعني يوصل للبطن فقط
من اول غسلة حسيتها قصرت شوي
بس ممكن تطلع حلوة مع هاي ويست جينز و البلوزة داخل

 

حلق الورد الابيض : 6 ريال
حبيتة مرة مرة
مقاسة مناسب لا هو الكبير مرة ولا هو الصغيرمرة
لمعته حلوة و لون ابيض مطفي

النظارات الشمسية : 12 ريال
اولا حبيت الشنطة حقتها قوية و مدعمة و تحمي النظارة كويس
تجي معها قماشة مخمل لتمسيح العدسات
و النظارة نفسها حبيتها شكلها فخم و انيق
على اللبس جميلة ترسم العين زي ما يقولون
الاذرع  مصنوعة من معدن , على كل حبيتها و انصحكم فيها

 

الملعقة : 4 ريال

شكلها بالصورة كبير بس عالطبيعة حسيتها صغيرة جدا

بس على العموم حلوة وكيوت

الي ما حبيته الجزء الوردي جاني ممخش و متوصخ شوي

بعد التجربة :

حبيتها حادة وتقطع بسهولة بجهه السكين وتعطي شكل كرة صغيرة لطيف من الجهه الاخرى

ممكن استخدامها تقطيع الفواكة 

السلبية الي لاحظتها هي قصر المقبض بحيث لو ابغى استخدم الجهه الكروية ف الجهه الحادة تجرح اليد 😓

- هذا مقطع من قناتي لتجربة تقطيع البطيخ /

https://youtu.be/KT81EU59ckc

 

ملعقة الشاي: 6 ريال
للي ما يعرف هاذي زي الملعقة فيه مكان نحط فية شاي فرط او
نعناع او اي شي نبي نشربة و نسكرة و نحطة في كوب ماء ساخن
- حبيتها وحبيت العلبة كيوت مادة الصنع ستانلسستيل
الي يميز ستانلس ستيل انه ما يصدي

مصاصات ( شفاط ) ستانلس ستيل : 6 ريال
طبعا الفايدة منهم اني استخدمهم عوضا عن الشفاطات البلاستيك
لاني ممكن استخدمهم اكثر من مرة واعيد غسلهم و استخدامهم بينما البلاستك استعمالة مرة وحدة +
يحتاج البلاستيك الى مئات حتى الاف السنين ليتحلل !!
في كل مرة نستهلك بلاستك ونرمية كذا نراكم النفايات بالبيئة
فيتضرر الانسان و الحيوان و النبات (البلاستيك احد اكبر الاسباب )
- حبيت جودتهم و يجون في كيس قماشي اسفنجي و معهم هاذي الفرشة للتنظيف

الكعب : 43 ريال
شكلة لطيف
حبيتة بشكل عام انصحكم تاخذون اكبر بنمرة
حبيت القماش مخمل
بعد التجربة :
حبيت انه قصير و يتعب حتى لو وقفت مدة قصيرة

هاذي تقطع الخضار على شكل حلزوني : 4 ريال
مادة الصنع : بلاستيك
بعد التجربة :
في البداية صعب التعامل معها يبيلها استعمال اكثر من مره على ما تتعود يدك
حبيت تقطيعها كان حاد و سهل وانتجت لي تقطيع حلزوني جميل
جربتها على البطاطس
السلبية الي لاحظتها : ان لما تقطع الخضار تطلع لك اجزاء نحيفة و اجزاء سميكة يعني مو متساوي

مجموعة حلق : 4 ريال
حلوين عموما
الحلقة الكبيرة هي اكثر شي عجبني لمعتها حلوة

قطاعة خضار سباغيتي : 11 ريال
مادة الصنع : بلاستيك و الشفرة حديد اتوقع
حبيت ان في جهتين جهة تقطع شرائط نحيفة و جهة شرائط عريضة
الي ما حبيتة الحديد الي على الجانبين واحد كان علية بلاستيك حماية
الثاني ما كان علية ف جاني ممشخ و متوسخ
بعد التجربة :
بأختصار عبارة عن "خردة"
صعب الاستخدام بسهولة ممكن تجرح اليد
و بالنهاية ما طلعت الخضار بشكل خيوط كان شكلها غريب وكل ما احاول اضبطها تتقطع
جربت من الجهتين و كلهم سيئين
منتج فاشل للأسف مع انه كان اكثر شي متحمسة له 😤

ملاحظاتي العامة /

- ما حبيت التغليف ككل لانه الاشياء جتني بكيس فكانت فوق بعضها و شوي حارة من الشمس
كنت متوقعة يجي بصندوق كرتون بس اعتقد هاذا راجع لشركة الشحن وليس "شي ان "

الحمد لله على نعمه التي لا تحصى ولا تعد😍
وبس اتمنى اكون افدتكم
و الى اللقاء في تدوينة جديدة 🙋🙋🙊