مشترياتي من موقع شي ان Shein Haul

مشترياتي من موقع شي ان Shein Haul

بسم الله الرحمن الرحيم

مقدمة :

اهلين اليوم بكتب عن تجربتي الثانية في الشراء

من موقع شي ان و هو موقع مختص بالملابس و 

الاكسسوارات و الكماليات وغيرها 

:)

الطلب :

طلبت عبر تطبيقهم و دفعت بالفيزا و ممكن الدفع عند الاستلام

بس انصحكم تدفعون اونلاين لانه راح يخصم لكم

استخدمت كود خصم اعطوني اياه كان (shein20 )

ولكن مادري اذا بيضبط معكم ولا خلصت صلاحيتة :)

بس عموما لو كتبتوا بقوقل ( كود خصم شي ان ) راح يطلع لكم

و خصم لي كثير الصراحة 

السعر كان / 417

بعد كود الخصم و خصم الدفع اونلاين / 290 

!!!!

التوصيل :

بحسابي بالموقع مكان تتبع الشحنة حط لي ان الشحنة لازالت بمستودع الصين 

و عند الطلبية مكتوب انه تم شحن طلبك 😕؟

المهم قلت بنتظر واذا تأخروا بكلمهم 

و الحمد لله ما تأخر الطلب اخذ 6 ايام ووصلت لي اليوم

مشترياتي و رأيي :

(بحط الاسعار بدون الخصم )

الفستان الاحمر : 50 ريال
 عالطبيعة يميل عالون العنابي
القماش حلو بس خفيف مو ثابت حسيته يسمن شوي
القماش مو شفاف

بس عند نهاية الاكمام الخياطة مو حلوة

الفستان الوردي : 54 ريال
حبيت القماش ثقيل وغير شفاف و الشكل نفس الصورة بس حسيته شوي اقصر بشي بسيط
بس يحتاج كوي وبيطلع رهيب حبيتة
بعد التجربة :
بالبس شكلة جميل و انيق الملاحظتين الي عندي
1- المقاس تمام ولكن عند الاكمام شوي ضيق
2- الفستان شفاف بشكل بسيط بمعنى لو لبستي شي غامق تحته راح يبين اللون

البلوزة :29 ريال
قطنية و غير شفافة
حبيت مقاسها يعني خذوا مقاسكم بالضبط
غسلتها اكثر من مرة ونفس ماهي جودتها حلوة
بس انها طويلة شوي
شكلها كيوت 🙊

تي شيرت : 22 ريال
القماش حلو قطني خفيف
المقاس ما اعجبني حسيته غريب الاكمام واسعة و الوسط شوي ماسك
التي شيرت قصير يعني يوصل للبطن فقط
من اول غسلة حسيتها قصرت شوي
بس ممكن تطلع حلوة مع هاي ويست جينز و البلوزة داخل

 

حلق الورد الابيض : 6 ريال
حبيتة مرة مرة
مقاسة مناسب لا هو الكبير مرة ولا هو الصغيرمرة
لمعته حلوة و لون ابيض مطفي

النظارات الشمسية : 12 ريال
اولا حبيت الشنطة حقتها قوية و مدعمة و تحمي النظارة كويس
تجي معها قماشة مخمل لتمسيح العدسات
و النظارة نفسها حبيتها شكلها فخم و انيق
على اللبس جميلة ترسم العين زي ما يقولون
الاذرع  مصنوعة من معدن , على كل حبيتها و انصحكم فيها

 

الملعقة : 4 ريال

شكلها بالصورة كبير بس عالطبيعة حسيتها صغيرة جدا

بس على العموم حلوة وكيوت

الي ما حبيته الجزء الوردي جاني ممخش و متوصخ شوي

بعد التجربة :

حبيتها حادة وتقطع بسهولة بجهه السكين وتعطي شكل كرة صغيرة لطيف من الجهه الاخرى

ممكن استخدامها تقطيع الفواكة 

السلبية الي لاحظتها هي قصر المقبض بحيث لو ابغى استخدم الجهه الكروية ف الجهه الحادة تجرح اليد 😓

- هذا مقطع من قناتي لتجربة تقطيع البطيخ /

https://youtu.be/KT81EU59ckc

 

ملعقة الشاي: 6 ريال
للي ما يعرف هاذي زي الملعقة فيه مكان نحط فية شاي فرط او
نعناع او اي شي نبي نشربة و نسكرة و نحطة في كوب ماء ساخن
- حبيتها وحبيت العلبة كيوت مادة الصنع ستانلسستيل
الي يميز ستانلس ستيل انه ما يصدي

مصاصات ( شفاط ) ستانلس ستيل : 6 ريال
طبعا الفايدة منهم اني استخدمهم عوضا عن الشفاطات البلاستيك
لاني ممكن استخدمهم اكثر من مرة واعيد غسلهم و استخدامهم بينما البلاستك استعمالة مرة وحدة +
يحتاج البلاستيك الى مئات حتى الاف السنين ليتحلل !!
في كل مرة نستهلك بلاستك ونرمية كذا نراكم النفايات بالبيئة
فيتضرر الانسان و الحيوان و النبات (البلاستيك احد اكبر الاسباب )
- حبيت جودتهم و يجون في كيس قماشي اسفنجي و معهم هاذي الفرشة للتنظيف

الكعب : 43 ريال
شكلة لطيف
حبيتة بشكل عام انصحكم تاخذون اكبر بنمرة
حبيت القماش مخمل
بعد التجربة :
حبيت انه قصير و يتعب حتى لو وقفت مدة قصيرة

هاذي تقطع الخضار على شكل حلزوني : 4 ريال
مادة الصنع : بلاستيك
بعد التجربة :
في البداية صعب التعامل معها يبيلها استعمال اكثر من مره على ما تتعود يدك
حبيت تقطيعها كان حاد و سهل وانتجت لي تقطيع حلزوني جميل
جربتها على البطاطس
السلبية الي لاحظتها : ان لما تقطع الخضار تطلع لك اجزاء نحيفة و اجزاء سميكة يعني مو متساوي

مجموعة حلق : 4 ريال
حلوين عموما
الحلقة الكبيرة هي اكثر شي عجبني لمعتها حلوة

قطاعة خضار سباغيتي : 11 ريال
مادة الصنع : بلاستيك و الشفرة حديد اتوقع
حبيت ان في جهتين جهة تقطع شرائط نحيفة و جهة شرائط عريضة
الي ما حبيتة الحديد الي على الجانبين واحد كان علية بلاستيك حماية
الثاني ما كان علية ف جاني ممشخ و متوسخ
بعد التجربة :
بأختصار عبارة عن "خردة"
صعب الاستخدام بسهولة ممكن تجرح اليد
و بالنهاية ما طلعت الخضار بشكل خيوط كان شكلها غريب وكل ما احاول اضبطها تتقطع
جربت من الجهتين و كلهم سيئين
منتج فاشل للأسف مع انه كان اكثر شي متحمسة له 😤

ملاحظاتي العامة /

- ما حبيت التغليف ككل لانه الاشياء جتني بكيس فكانت فوق بعضها و شوي حارة من الشمس
كنت متوقعة يجي بصندوق كرتون بس اعتقد هاذا راجع لشركة الشحن وليس "شي ان "

الحمد لله على نعمه التي لا تحصى ولا تعد😍
وبس اتمنى اكون افدتكم
و الى اللقاء في تدوينة جديدة 🙋🙋🙊

حلا قهوة بارد ( بالصور )

طريقة حلا قهوة بارد ( بالصور )

بسم الله الرحمن الرحيم

المقادير :

ظرف كريمة بودرة

ظرف كريم كاراميل

علبة قشطة

ربع علبة حليب مكثف محلى

خمس حبات جبن كريمي

2 باكيت بسكوت كوفي جوي ( ممكن اي بسكوت عندكم)

حليب سائل ( لتغميس البسكوت )
بودرة شوكولاتة ( للتزيين )

الطريقة :

يغمس البسكوت بالحليب و يرص بالاكواب

استخدمت حبيتين بسكوت لكل كوب

بالخلاط نضع :

علبة قشطة

ظرف كريمة بودرة

5 حبات جبن كريمي

ظرف كريم كاراميل

 ربع علبة حليب مكثف محلى


وهذا الشكل بعد الخلط


يوزع الخليط تقريبا مقدار ربع كوب من الخليط

وبعدها يترك بالثلاجة ثلاث ساعات فأكثر انا خليتة 5 ساعات
و الافضل يطول عشان تطلع الكريمة متماسكة

ملاحظة : كمية الخليط اعطى 9 اكواب حلى :)

وبالعافية

شكرا لقرائتكم
والى اللقاء في تدوينة جديدة 😻🙋

طريقة ورق عنب بالصور

طريقة ورق عنب بالصور

المقادير :

ورق عنب ( انا استخدمت قودي وانصحكم فية و لازم تغسلونة وتعصرونه على الخفيف من الماء الزايد)

ثلاث اكواب رز مصري ( نغسلة 3 مرات على الاقل )

حزمة بقدونس 

2 طماطم

2 بصل

ملعقتين نعناع طازج

5 فصوص ثوم مهروس ( زيدو الكمية على حسب رغبتكم)

حبيتن او ثلاث حبات بطاطس 

عصير ليمونتين

كوب زيت زيتون ممتاز

كوب دبس رمان تقريبا

البهارات / ملح و فلفل و كمون وبهار بديل الماجي و نعناع مجفف وملح ليمون اختياري

لصوص الطبخ / مكعب مرقة دجاج و كوب ماء ساخن و عصير نصف ليمونه و شوي زيت زيتون ودبس رمان

فرمت البقدونس

 ثلاث اكواب رز مصري مغسول

هنا الخضار الي بحطها بالرز 

وهاذي البهارات : نعناع مجفف ملعقتين كبار

الفنجان الصغير كمون

ملح  وفلفل ملعقة كبيرة

ملعقة كبيرة ملح الليمون (اختياري)

و ملعقة كبيرة بديل الماجي

وهنا راح اضيف دبس الرمان و بيالة عصير ليمون و كوب زيت زيتون

وهذا الشكل بعد الخلط طبعا ببدا استعملها بالحشو على طول ما يحتاج اطبخها

وهذا الورق بعد ما غسلته وعصرته من الماء الزايد 

هنا اثناء اللف

 قطعت البطاطس شرايح سميكة

 صفيت طبقة بطاطس اسفل القدر

ابدا اصف فوقه حبات الورق عنب بهذا الشكل واحاول اخليها متزاحمة ومرصوصة 

واذا لاحظتي اوراق تكون سميكة حطيها بأسفل القدر عشان تاخذ استوا اكثر ( لقربها من الحرارة)

بعد ما رصينا الورق عنب نحط فوقها صحن و ثقل في الاسواق يباع مخصص بس ما عندي ف استخدمت زبدية سيراميك ثقيلة وعبيتها مويها عشان تثقل اكثر

- و بعد ما حطينها الثقل الي راح يضمن لنا ان الورق عنب ما تنفتح لفته راح نسوي صوص الطبخ

تلقون مقاديره فوق↑

راح نصبه على الورق عنب 

طريقة الطبخ :

الحرارة راح نشغلها على اعلى شي لمدة 5 دقايق فقط لا غير

وبعدها نخفض النار الى درجة اقل من المتوسط بشوي 

بالنسبة لي الفرن كهربائي حطيت درجة 2

وخليتة يطبخ لمدة ساعة و ربع

وبعد ما طبخ شلتة من النار و خليتة يبرد بحرارة الغرفة بدون ثلاجة لمدة 9 ساعات او ليلة 

انا نمت و صحيت و بعدها قلبتة و اكلته مع مامتي 

وشاركت الاعزاء على قلبي بعضا منه 💓💓

ملاحظة : ما انصحكم تحفظونة بالثلاجة لانه على الاغلب الزر راح يحبب

الافضل تاكلونة طازج و بالعااافية 

شكرا لزيارتكم مدونتي :)